蝙蝠俠外傳之我要除面具 (扑頭醒腦)

蝙蝠俠外傳之我要除面具

扑頭黨黨員 | 21st Aug 2009 | 一般 | (123 Reads)

.

一個月黑風高嘅晚上，蝙蝠俠韋布斯約咗超人簡基勒在一片荒野中聚舊。

「老超，你知道嘛，我真係好羨慕你有超能力。」

「蝙蝠仔，我覺得你先厲害呀，冇超能力都一樣可以打低咁多壞蛋。」

「唔係呀，唔關打交事，其實我唔係羨慕你可以飛天遁地力大無窮，而係羨慕你可以有咁厲害嘅超能易容術。」

「吓???我嘅超能易容術???」

「係呀，我都好想好似你咁，只要著起西裝，戴起眼鏡就變成簡基勒，然後居然又冇人會認得你就係超人，我真係好羨慕你唔駛戴面具。你知道嘛，我成日要戴住面具，箍住塊面好唔舒服，焗住d汗又鬼死咁臭。」

「咁又係，成日要戴住面具又真係幾辛苦!!!」

「講開又講啦，你知道嘛，每當我要出動，要戴起呢個面具做蝙蝠俠嘅時候，我都會諗，究竟乜嘢先係面具呢???」

「吓???蝙蝠仔你想講乜呀???」

「老超，我好迷失呀，其實我係韋布斯，定係蝙蝠俠呢???風度翩翩、討人歡喜嘅韋布斯，其實係唔係真正嘅我呢???韋布斯會唔會只不過係我一個欺騙世人嘅面具???而真正嘅我，會唔會反而係行為怪異，不容於世嘅蝙蝠俠呢???一諗到呢度，我就會覺得好心寒，有一種好強烈嘅孤寂感覺湧上心頭，老超，你知道嘛，我越來越唔清楚自己係邊個，其他人就更加無法了解我，我覺得自己好寂寞，我非常寂寞。」

「蝙蝠仔，雖然我表面上唔駛好似你咁戴住面具，但作為一個有雙重身份嘅超級英雄，我又點會唔明白你嘅痛苦呢???我有個方法，或者可以令你快樂一點。」

「真係???老超，係咩方法呀???」

.

「就係……」

.

葛咸城，一所的士高之內，人頭湧湧，氣氛高漲，這裡正在舉行一個盛大嘅化裝舞會，有人化身成殭屍、女巫、卡通人、李小龍等等，眾人沉醉於玩樂之際，大門打開了，一位黑衣人走進來，隨即引起了一番騷動。

「嘩!!!你地快d嚟睇吓!!!係蝙蝠俠呀!!!佢扮得好似呀!!!」

「好厲害呀!!!呢個蝙蝠俠真嘅一樣呀!!!佢係邊個嚟架???」

「嘩!!!兄台，你好勁呀!!!介唔介意除低個面具俾我地睇吓你係邊個呀???」

.

全場起哄、詢眾要求之下，黑衣人提起雙手，慢慢地把面具除了下來。

.

「天呀!!!原來佢係韋布斯呀!!!佢係鑽石王老五，億萬富豪韋布斯呀!!!」

「嘩!!!估唔到韋布斯呢d大人物都會嚟玩喎!!!」

「係啦，仲要扮得咁似，如果唔係除咗面具，我以為佢真係蝙蝠俠呀!!!」

.

呢一晚，蝙蝠俠終於釋放了自己，在眾人面前除下了面具，現在他感覺到，他既是不容於世嘅蝙蝠俠，又是討人歡喜嘅韋布斯，他不用再理會甚麼是假面具，也不需再問，那個才是真正的自己，呢一晚，這個黑衣人，他內心那寂寞的痛苦消失了，玩得特別興奮忘形，還拉着小丑共舞……

後記

由細到大，小弟最鍾意嘅漫畫英雄就係蝙蝠俠，而小弟心目中嘅蝙蝠俠，在英明神武嘅背後，應該係一個非常沈鬱，甚至有輕微心理變態嘅怪人。

呢個故事，源於早前參加嘅火羽x逸之Summer Party，Party完結後，小弟有d感觸，然後腦海中就出現咗呢個故事。

死啦!!!盜用咗蝙蝠俠個名嚟惡搞，希望唔會俾人告啦!!!哈哈!!!

留言(14) | 引用(0) | 話題(小故事)

[1]

Party點解會令你感觸起蝙蝠俠,好9唔搭8啵 emotion

[引用] | 作者毫無人性 | 21st Aug 2009 | [舉報垃圾留言]

毫無人性 :
Party點解會令你感觸起蝙蝠俠,好9唔搭8啵

其實我平時都係經常9唔搭8架啦，不過今次應該唔係太難理解啫，或者我俾個貼士你啦，留意吓篇文第二幅圖，同我自己張相係唔係有d相似呢???呢個係一個小小嘅暗示，哈哈!!!

[引用版主回覆] | 作者扑頭黨黨員 | 22nd Aug 2009

[2]

我反而喜歡人家給我差異反應, 實在好好玩~
正如人人覺得女王應該係點係點, 而我貌不乎實外表, 令人錯愕感覺等於大家估我唔到, 正~
面具於占星學就是上升星座~
網絡世界就係真正火羽, 現實世界未必是~

[引用] | 作者飛天火羽 | 21st Aug 2009 | [舉報垃圾留言]

哈哈!!!我估大家都一定估唔到我嘅真人係咁斯文大方(笑)，不過其實女王真人同我想像中差唔多，都係咁索!!!(閃)

上升星座???好明顯我係唔會明的。

網上世界嘅扑頭黨黨員，同現實世界嘅mike好唔同，最多只能算係簡化版嘅mike，不過其實我喜歡扑頭黨黨員多於mike，真無奈!!!

[引用版主回覆] | 作者扑頭黨黨員 | 22nd Aug 2009

[3]

幸好不是要脫超人的紅色小褲褲。

[引用] | 作者灰先生 | 21st Aug 2009 | [舉報垃圾留言]

其實我同灰先生嘅諗法好相似，我真係有諗過寫多一篇”超人外傳之我要除底褲”架!!!哈哈哈哈!!!

[引用版主回覆] | 作者扑頭黨黨員 | 22nd Aug 2009

[4]

俾你講一講,我又想番睇《黑夜之神》

[引用] | 作者問號人 | 21st Aug 2009 | [舉報垃圾留言]

“黑夜之神”真係好正，個中心思想好值得考究，不過我略嫌裡面嘅韋布斯太正常，我始終覺得，一個將自己打扮到唔人唔鬼四圍走嘅人，一定係本身有心理病，我就最鍾意添布頓拍嘅蝙蝠俠第一二集裡面嘅韋布斯，d舉止怪怪地咁，俾到人一種好神經質嘅感覺，正!!!

[引用版主回覆] | 作者扑頭黨黨員 | 22nd Aug 2009

[5] Re: 灰先生

灰先生 : 幸好不是要脫超人的紅色小褲褲。

=紅色小褲褲= 面褲!!
NOT INTERESTING~

[引用] | 作者飛天火羽 | 21st Aug 2009 | [舉報垃圾留言]

超人條紅色三角褲究竟係底褲定面褲呢???呢個問題喺學術界爭論咗好多年，亦係超人其中一個重點魅力所在呀!!!哈哈哈哈!!!

[引用版主回覆] | 作者扑頭黨黨員 | 22nd Aug 2009

[6]

問題是，除下面具後，連自己都不能面對。戴上面具反而覺得自在。

[引用] | 作者方圓 | 22nd Aug 2009 | [舉報垃圾留言]

人類就係咁，害怕被人看見自己嘅陰暗面，所以喜歡戴上面具保護自己，因此人與人之間普遍存在重重隔膜，就算係至親嘅人，都未必可以真正了解對方嘅心靈。

[引用版主回覆] | 作者扑頭黨黨員 | 23rd Aug 2009

[7]

又有錢，又打得，又有型，如果蝙蝠俠無返些明顯的缺點，只怕會令一眾男讀者不滿而已！

[引用] | 作者帕拉汀 | 23rd Aug 2009 | [舉報垃圾留言]

係呀，如果好似C朗咁溝晒d女就最黑人憎!!!(恨)

[引用版主回覆] | 作者扑頭黨黨員 | 24th Aug 2009

[8]

乜咁感慨呀，見真面目啫~~

[引用] | 作者 Dozy | 24th Aug 2009 | [舉報垃圾留言]

冇辦法啦，我實在太感性喇!!!哈哈哈哈!!!

[引用版主回覆] | 作者扑頭黨黨員 | 24th Aug 2009

[9] Re: 問號人

問號人 :

“黑夜之神”真係好正，個中心思想好值得考究，不過我略嫌裡面嘅韋布斯太正常，我始終覺得，一個將自己打扮到唔人唔鬼四圍走嘅人，一定係本身有心理病，我就最鍾意添布頓拍嘅蝙蝠俠第一二集裡面嘅韋布斯，d舉止怪怪地咁，俾到人一種好神經質嘅感覺，正!!!

《batman》同《batman returns》我都有睇過,尤以《batman returns》最為精彩。
戲中蝙蝠俠、企鵝同貓女都是現實世界的悲劇人物,碰巧他們都是"半人半獸"以動物作為他們在現實世界的身份象徵,當種種相似的特質放在一齊,自然會產生化學作用。而這些帶點神經質的邊緣角色,正正係電影成功之處。如果你有睇開Tim Burton的電影,你可以見到大多數角色都是近乎病態,所以蝙蝠俠第一二集的人物設定和故事,根本是老添最嗜長的題材,拍起來自然更得心應手。
仲有故事背景明明係現代,但無論衣服同建築物各方面,老添偏偏將葛咸城描寫成活像4、50年代的紐約,真係好特別。可惜之後兩集被祖舒馬查拍爛左,不然整個系列會更完美。

[引用] | 作者問號人 | 24th Aug 2009 | [舉報垃圾留言]

厲害，問號兄對電影好有研究喎，當年小弟睇第一集蝙蝠俠果陣仲好細個，唔識邊個係添布頓，亦唔識思考套戲嘅深意，只係覺得好特別，好過癮。

中間果兩集真係低級趣味，好在最新兩齣蝙蝠俠回復高水準，尤其"黑夜之神"，我睇完之後心情好沈重，不停反思做英雄嘅意義同代價，聽講之後仲會再拍，希望可以繼續保持水準啦!!!

[引用版主回覆] | 作者扑頭黨黨員 | 25th Aug 2009

[10]

會唔會係因為蝙蝠俠喺superhero系列中係最有米嗰個，所以患上「食飽無憂米症候群」?

如果蝙蝠俠問嗰個係蜘蛛俠，蜘蛛俠爆粗都似，蜘蛛俠窮到三餐不繼…