天呀~~~~!!!!!!

點解會係咁架???真係晴天霹靂!!!原來忌廉已經有男朋友，仲要3個月之後就結婚，而家我個心嗱住嗱住痛，天呀~!!!

大受打擊嘅我，喺條街度漫無目的咁四圍行，而家我真係六神無主，好痛苦呀!!!有冇人可以救救我呀???我就打咗俾我嘅兩個好兄弟，浩南同阿咪，講咗呢個惡耗俾佢地聽，然後，佢地好快就出現喺我面前。

浩南同阿咪話我而家咁嘅情形，點安慰都冇用架喇，佢地話我而家最需要嘅係發洩喎，於是佢地決定要帶我去一個可以供人發洩嘅地方，吓!!!唔通去夜總會???點知......原來佢地只不過係要帶我去唱K。

入到K房，佢地叫我點歌，盡情唱盡情發洩喎，於是我就點咗一首經典嘅寡佬慘情歌，陳小春嘅”我愛的人”。

「我愛的人~~ 不是我的愛人~~

她心裡每一寸~~ 都屬於另一個人~~」

.

我投入400%嘅感情，唱到聲淚俱下，令阿咪大受感動：「阿發，如果你真係咁鍾意忌廉，不如勇敢d追佢返嚟啦!!!」

「唉，佢3個月之後就要同嗰個灰先生結婚，我仲可以點追喎???」我已經冇希望喇。

阿咪唔同意：「不過咁喎，如果從另一個方向諗，你可以當呢3個月係你嘅最後機會，如果最後你都追唔到忌廉，你都只不過係白費咗3個月時間啫，損失有限啦，但係如果俾你成功咗，你就可以得到你最愛嘅人，咁樣其實係以小搏大，刀仔鋸大樹呀，點解唔搏一搏呢???」

嗯，阿咪好似又有d道理喎，不過我都係好擔心：「你要我做第三者橫刀奪愛，咁樣好似好衰喎???」

阿咪反問：「有幾衰呀???公平競爭啫，咁啦，我唱首歌俾你聽，你再慢慢考慮吓啦。」

然後阿咪點咗首歌，係關心妍嘅”優先訂座”。

「到最後能令你捨他而去~~敵人就讚我肯爭取~~」

.

聽完之後，我開始明白喇，愛一個人應該要勇往直前，努力爭取，雖然過程中可能會好痛苦，但係最緊要唔好俾自己將來先嚟後悔。

「好啦，阿咪，我明白喇，我決定聽你講，我就用未來呢3個月嘅時間搏一搏，追忌廉返嚟啦!!!」

一直沈默嘅浩南，聽到我呢個決定，終於開口：「阿發，你諗清楚喎，真係要咁做???」

「冇錯，我要搏!!!」

「既然你咁堅決，我都無話可說喇，好啦，我又唱返首歌先。」浩南點咗首歌，又係陳小春。

. 

我明白，浩南又係想憑歌寄意嘛，不過，下次佢有乜嘢最好都係直接同我講啦，咁我會舒服好多，因為，佢唱歌真係好鬼難聽呀!!!