第二日返到公司，諗住即刻搵忌廉啦，不過同事Mimi話忌廉打咗電話返嚟，話自己唔舒服要請假喎。 

第三日，忌廉又請咗假。 

第四日，忌廉都係請咗假，我開始擔心，究竟佢乜嘢病咁嚴重呢???我打佢電話，點知飛咗去留言信箱。 

當我正想留言，霞姐忽然走埋嚟：「死仔，老細叫你入房見佢呀。」霞姐呢幾日對我都黑口黑面，好明顯仲嬲緊我冇俾文少個電話佢啦。 

入到房，老細Dozy同我講：「阿發，公司最近接咗個大客，佢係一個日本人，叫毫無人性。」 

「吓???毫無人性???」個名咁衰嘅??? 

Dozy好興奮：「呀，唔係，我講錯咗，唔係毫無人性，係浩武仁勝，佢係麥記新上任嘅市場部經理，佢想搵我地公司幫麥記拍一系列嘅廣告，呢個大Project我會親自出馬，原本叫咗幾位同事幫我手，其中一個係忌廉，我而家決定搵你幫手，代替忌廉個位。」 

「吓，咁忌廉點呀???」

「唔好提佢喇，而家d新人冇d責任感，都唔係做嘢嘅，佢再唔返工我就炒咗佢請過第二個。」  

哇!!!唔好呀，你炒咗忌廉，我見佢唔到，咁咪攞唔到佢條頭髮??? 

同Dozy老細傾完後，我一出房門就即刻再打俾忌廉，諗住叫佢唔好再請假啦，不過又係留言信箱，唔得，我要直接去搵到忌廉，不過我又唔知佢住係邊??? 

就係呢個時候，霞姐又行過嚟：「死開啦，唔好阻住個門口呀!!!」 

啱喇!!!霞姐係公司出晒名嘅是非精，可能幫到手喎，於是我馬上問佢：「霞姐，你知唔知忌廉住喺邊???」 

「超!!!我當然知啦，呢間公司無乜嘢係我唔知架，你想我話你知忌廉住邊呀???你慳d啦，上次我問你文少個電話，你詐傻扮矇唔肯講，今次唔駛旨意我會幫你呀!!!」 

死喇!!!霞姐果然懷恨在心，早知之前就唔呃佢啦，不過如果要氹佢講忌廉個地址俾我聽，我都仲有一個辦法。 

「霞姐，我上次冇呃你架，我真係唔知文少個電話，不過咁，之前喺醫院果陣文少同我提過佢有間網吧，我知道間網吧喺邊，不如咁啦，你話我知忌廉住邊，我就話你知文少間網吧喺邊啦。」 

霞姐本來都仲係黑口黑面，但係一聽到我有文少嘅下落，就馬上變臉，露出春意盈盈嘅笑容：「衰仔!!!早講嘛!!!殺你!!!」