實在太好喇，學咗兩個月結他，小弟終於成功用兩個chord彈到一首走音嘅”小蜜蜂”!!!
.
邊首"小蜜蜂"???呢首呀：「嗡用用~~勇容容~~鵝是日隻燒乜蜂~~」
.
點解小弟會無啦啦學結他呢???話說喺十幾年前，有個親戚送咗一支舊嘅木結他俾我，我亂玩咗幾日，就將支結他擺埋一邊，一擺，就擺咗十幾年。
早排，同幾個朋友食飯，聽到其中一個朋友話學緊電子琴，另外一個仲勁，竟然學緊二胡，大家講到如果有一日可以一齊夾返隊Band就好喇!!!(雖然我未聽過有一隊Band係會有電子琴加二胡咁騎呢!!!)刺激起我都想學返樣樂器一齊玩，然後我就醒起，係喎，屋企有支結他喎!!!
於是我重新攞返起呢支沉睡咗十幾年嘅結他出嚟，雖然係殘舊d，不過都仲彈得喎，然後就去報咗個初級結他班，每個星期學一堂。
彈結他基本肢勢係左手按弦線，右手彈，阿Sir話初學者隻左手嘅手指頭按弦線會按到好痛，所以如果我地要學得成，就要忍得痛。想唔痛???就只有一個辦法，就係要克服痛楚。點先可以克服痛楚呢???就係要忍住痛彈多d，彈到d手指頭起晒枕，咁就會冇咁痛嘞。
阿Sir果然冇作大，d手指真係比想像中更痛，不過經過大約一個月嘅練習之後，我左手嘅手指頭，真係起咗枕。而家個枕越來越厚，彈起上嚟的確係冇咁痛，不過，除咗痛之外，連其他感覺亦都越來越微弱，以前觸摸物件時，從手指頭傳來嘅靈敏、細緻嘅觸覺，已經俾個枕破壞咗。冇辦法啦，要將痛楚隔絕，其他感覺也會被一併隔絕，這就是不想痛的代價吧。
以我咁出色嘅天賦，相信只要再苦練多十年八載，我就可以成為第二個區瑞強喇!!!話唔定到時香港就會出現一隊由結他，電子琴同二胡所組成嘅新派三人樂隊喇，哈哈哈哈!!!
