15分鐘之後，我就到達忌廉所住嘅一幢舊式唐樓嘅門前，一落車，就發現前面有一群路人，好一致咁抬高頭向上望，於是我又跟住向上望啦。 

一望，發現喺幢唐樓嘅天台，有一個人坐咗喺圍欄之上，呢個人，竟然係忌廉!!! 

咩事呀???忌廉做咩呀???有個路人甲大叫：「喂喂喂!!!條女好似想跳樓呀!!!」 

有個路人乙又大叫：「我報咗警喇，警察好快就到。」 

忌廉跳樓???哇!!!唔好呀!!!喺呢個危急關頭，我乜都唔理，馬上跑上樓梯，直奔上天台。 

我發狂咁跑，一上到天台，就大叫：「忌廉，唔好跳呀!!!」 

好在，忌廉仲未跳，佢仍然面向街外坐咗喺圍欄上面。另外，仲有一個人企喺旁邊，呢個人，就係忌廉嘅男朋友，果個灰先生。 

灰先生望一望我，然後同忌廉講：「你唔好咁傻啦，你咁樣逼我都冇用架，勉強冇幸福，早幾日我已經同你講得好清楚，我決定咗要同你分手，你自殺都冇用架!!!」 

咩話???灰先生要同忌廉分手??? 

見到忌廉一d反應都冇，灰先生好似有d煩躁：「就算你逼到我同返你一齊，我地都唔會開心，你咁樣又何苦呢???」  

忌廉仍然毫無反應，灰先生嘆一口氣：「係，係我衰，所以你更加唔應該因為我呢個衰人而自殺，唔值得架!!!」 

呢一刻，我真係好想問吓佢地，究竟發生咗乜嘢事呢???點解灰先生要同忌廉分手呢???不過喺呢個時候，我當然唔敢問長問短啦!!! 

而忌廉就仍然反常地毫無反應，死啦，唔通佢傷心到懵咗??? 

灰先生冇晒辦法，轉過來問我：「你係唔係忌廉嘅同事阿發???你幫我勸吓佢啦。」 

勸???點勸好呢???然後我醒起，電影”鐵達尼號”裡面，里安納度狄卡比奧用一句對白，「You jump, I jump.」，成功勸服琦溫斯莉唔好跳海。 

好!!!就試吓用呢招啦!!!我清一清自己嘅喉嚨，然後行前一步，用一把深情過顏聯武嘅聲線，對忌廉講：「忌廉，你跳，我跳。」 

嗱!!!我當然係同里安納度狄卡比奧一樣，只係講吓架咋，唔好真係跳呀!!! 

然後，忌廉竟然回身望向我，佢終於有反應喇!!!估唔到呢句對白真係咁有用!!! 

更估唔到嘅係，之後忌廉竟然問我：「阿發，你係唔係鍾意我???」 

吓???呢個時候問d咁嘅嘢???我見到灰先生立即一臉疑惑望住我，令我好鬼尷尬。 

忌廉再追問：「阿發，你答我啦。」 

既然係咁，好啦!!!反正我都決定咗要撬人牆腳，唔理咁多喇，我答：「係，其實你應該早就知道，我鍾意你。」 

灰先生似乎大感意外，不過更加估唔到嘅係，忌廉竟然再問我：「阿發，你可唔可以做我男朋友???」 

吓???我呆咗幾秒…………然後好勇敢咁講咗一句：「可以。」 

我一講完，忌廉竟然馬上從圍欄上落返嚟，行到我身邊，然後......